ຈີນ ແລະ ອາຊຽນຮ່ວມກັນປາບການພະນັນທາງອິນເຕີເນັດ ແລະ ການຫຼອກລວງທາງໂທລະຄົມຂ້າມຊາດ

ວັນ​ທີ 16 ມັງ​ກອນ​ນີ້, ທ່ານ​ຫວາງ​ຢີ້ ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ​ຄອ​ມ​ມູ​ນິດ​ຈີນ ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ​ຈີນ ໄດ້​ຕ້ອນ​ຮັບ​ການ​ເຂົ້າ​ຢ້ຽມ​ຂ່ຳ​ນັບ​ຂອງ​ທູ​ຕາ​ນຸ​ທູດ​ຂອງ 10 ປະ​ເທດ​ສະ​ມາ​ຊິກ​ອາ​ຊຽນ​ຢູ່​ນະ​ຄອນຫຼວງ​ປັກ​ກິ່ງ ໂດຍ​ກ່າວ​ວ່າ: ໃນ​ຫວ່າງ​ມໍ່ໆ​ມາ​ນີ້, ຢູ່​ເຂດ​ຊາຍ​ແດນ​ໄທ​-ມຽນ​ມາ​ໄດ້​ເກີດ​ຄະ​ດີ​ການ​ພະ​ນັນ​ທາງ​ອິນ​ເຕີ​ເນັດ ແລະ ການຫຼອກ​ລວງ​ທາງ​ໂທ​ລະ​ຄົມ​ແບບ​ໂຫດ​ຮ້າຍຫຼາຍ​ຄະ​ດີ ໂດຍ​​ເປັນໄພຂົ່ມ​ຂູ່ ແລະ ທຳ​ລາຍ​ຜົນ​ປະ​ໂຫຍດ​ຕົວ​ຈິງ​ຂອງ​ພົນ​ລະ​ເມືອງ​ຈີນ ແລະ ພົນ​ລະ​ເມືອງ​ປະ​ເທດ​ອື່ນ ເຊິ່ງ​ຕ້ອງ​ໄດ້​ໃຫ້​ຄວາມ​ສຳ​ຄັນ​ໃນ​ລະ​ດັບ​ສູງ​ຕໍ່​ເລື່ອງ​ນີ້. ຫວັງ​ວ່າ​ປະ​ເທດ​ທີ່​ກ່ຽວ​ຂ້ອງ​ຈະ​ແບກ​ຫາບ​ຄວາມ​ຮັບ​ຜິດ​ຊອບ, ປະ​ຕິ​ບັດ​ມາດ​ຕະ​ການ​ຢ່າງ​ເຂັ້ມ​ງວດ, ເດັດ​ດ່ຽວ​ປາບ​ປາມການ​ພະ​ນັນ​ທາງ​ອິນ​ເຕີ​ເນັດ ແລະ ການ​ຫຼອກ​ລວງ​ທາງ​ໂທ​ລະ​ຄົມ, ປົ​ກ​ປ້ອງຄວາມ​ປອດ​ໄພ​ດ້ານ​ຊັບ​ສິນ ແລະ ​ຊີ​ວິດ​ຂອງ​ປະ​ຊາ​ຊົນ, ບໍ່​ອະ​ນຸ​ຍາດ​ໃຫ້​ຜູ້​ຕ້ອງ​ໂທດ​ພົ້ນຈາກ​ການ​ລົງ​ໂທດ​ຂອງ​ກົດ​ໝາຍ​ໄດ້​ຢ່າງ​ເດັດ​ຂາດ.

ຈີນ​ຍິນ​ດິ​ຮ່ວມ​ກັບ​ບັນ​ດາ​ປະ​ເທດ​ສະ​ມາ​ຊິກ​ອາ​ຊຽນ ເພີ່ມ​ທະ​ວີ​ການ​ຮ່ວມ​ມື​ສອງ​ຝ່າຍ ແລະ ຫຼາຍ​ຝ່າຍ ໃນ​ດ້ານ​ການ​ປະ​ຕິ​ບັດ​ກົດ​ໝາຍ ແລະ ຄວາມ​​ປອດ​ໄພ ເພື່ອ​ສ້າງ​ສະ​ພາບ​ແວດ​ລ້ອມ​ທີ່​ປອດ​ໄພ​ໃຫ້​ແກ່​ການ​ໄປ​ມາ​ຫາ​ສູ່​ກັນ​ລະ​ຫວ່າງ​ປະ​ຊາ​ຊົນ​ບັນ​ດາ​ປະ​ເທດ, ປົກ​ປ້ອງ​ຄວາມ​ເປັນ​ລະ​ບຽບ​ທີ່​ດີ​ສຳ​ລັບ​ການ​ໄປ​ມາ​ຫ​າ​ສູ່​ກັນ ແລະ ການ​ຮ່​ວມ​ມຶ​ລະ​ຫວ່າງ​ປະ​ເທດ​ອ້ອມ​ຂ້າງ.

来源：CGTN、广西北部湾之声