ຕະຫຼອດໄລຍະ 75 ປີຜ່ານມາ ຈີນຮ່ວມຊາຕາກຳກັບໂລກດ້ວຍ “3 ຖານະບົດບາດ”

ນັບແຕ່ ສປ ຈີນ ສະຖາປະນາຂຶ້ນເປັນເວລາ 75 ປີຜ່ານມາ, ໄດ້ຍຶດໝັ້ນນະໂຍບາຍການຕ່າງປະເທດສັນຕິພາບທີ່ເປັນເອກະລາດ ແລະ ເປັນເຈົ້າຕົນເອງ, ປະຕິບັດຕາມຫຼັກ 5 ປະການຂອງການຢູ່ຮ່ວມກັນໂດຍສັນຕິ, ເປັນຜູ້ສ້າງສັນຕິພາບຂອງໂລກ ຜູ້ປະກອບສ່ວນເພື່ອການພັດທະນາຂອງໂລກ ແລະ ຜູ້ຮັກສາລະບຽບການຂອງໂລກ ຢ່າງສະເໝີຕົ້ນສະເໝີປາຍ, ໄດ້ກ້າວໄປຕາມເສັ້ນທາງການຫັນເປັນທັນສະໄໝທີ່ພັດທະນາໂດຍສັນຕິ.

ເມື່ອຜະເຊີນກັບຄຳຖາມແຫ່ງຍຸກສະໄໝທີ່ຄວນສ້າງໂລກເປັນແນວໃດ ແລະ ການເຮັດແນວໃດເພື່ອສ້າງໂລກນີ້, ປະເທດຈີນໄດ້ໃຫ້ຄຳຕອບຂອງຕົນ ຄືສ້າງປະຊາຄົມຮ່ວມຊາຕາກຳຂອງມວນມະນຸດ.

ປີ 2022, ທ່ານສີຈິ້ນຜິງ ປະທານປະເທດຈີນໄດ້ສະເໜີຂໍ້ລິເລີ່ມຄວາມໝັ້ນຄົງໂລກ ເຊິ່ງໄດ້ສະໜອງຫຼັກການພື້ນຖານໃຫ້ແກ່ການແກ້ໄຂບັນຫາຄວາມໝັ້ນຄົງ ແລະ ສະແຫວງຫາສັນຕິພາບຖາວອນ. ຄວາມຈິງໄດ້ຢືນຢັນແລ້ວວ່າ ປະເທດຈີນພັດທະນາເປັນກ້າວຂຶ້ນກ້າວໜຶ່ງ, ກຳລັງສັນຕິພາບກໍຈະເຂັ້ມແຂງຂຶ້ນກ້າວໜຶ່ງເຊັ່ນກັນ.

ປີ 2021, ຈີນໄດ້ສະເໜີຂໍ້ລິເລີ່ມການພັດທະນາໂລກ. ປັດຈຸບັນນີ້, ມີ 100 ກວ່າປະເທດ ແລະ 20 ກວ່າອົງການຈັດຕັ້ງສາກົນໄດ້ໃຫ້ການສະໜັບສະໜູນຕໍ່ຂໍ້ລິເລີ່ມດັ່ງກ່າວ, ມີ 82 ປະເທດໄດ້ເຂົ້າຮ່ວມ “ໜ່ວຍເພື່ອນມິດແຫ່ງຂໍ້ລິເລີ່ມການພັດທະນາໂລກ”, ກຳລັງແຮງຂອງການຮ່ວມກັນສະແຫວງຫາການພັດທະນາຂອງໂລກໄດ້ເຂັ້ມແຂງຂຶ້ນເລື້ອຍໆ.

ຊາວໂລກໄດ້ເຫັນວ່າ ໃນກໍລະນີຫຼາຍຝ່າຍ, ຈີນໄດ້ຍຶດໝັ້ນຊ່ວຍປະເທດພວມພັດທະນາໃນການກ່າວຄຳເຫັນເພື່ອຄວາມເປັນທຳ ແລະ ແກ້ໄຂຄວາມຫຍຸ້ງຍາກ, ກົນໄກການຮ່ວມມືບຣິກສໄດ້ຮັບເອົາສະມາຊິກໃໝ່, ສະໜັບສະໜູນສະຫະພາບອາຟຣິກາເຂົ້າຮ່ວມກຸ່ມ G20, ສະມາຊິກທະນາຄານລົງທຶນພື້ນຖານໂຄງລ່າງອາຊີ ຫຼື AIIB ໄດ້ເພີ່ມຂຶ້ນເປັນ 110 ປະເທດ ແລະ ເຂດແຄວ້ນ, ກອງປະຊຸມເວທີເປິກສາຫາລືການຮ່ວມມືຈີນ-ອາເມຣິກາລາຕິນ ແລະ ກອງປະຊຸມເວທີເປິກສາຫາລືຈີນ-ອາຟຣິກາໄດ້ຈັດຂຶ້ນຕາມໆກັນ... ຢູ່ບົນເວທີສາກົນ, ສຽງແຫ່ງຄວາມເປັນຕົວແທນຂອງ “ພາກໃຕ້ໂລກ” ຫຼື Global South ນັບມື້ນັບເພີ່ມຂຶ້ນ.

75 ປີຜ່ານໄປ, ຊາວຈີນມີຄວາມຮັບຮູ້ນັບມື້ນັບເລິກເຊິ່ງຂຶ້ນວ່າ: ມວນມະນຸດເປັນປະຊາຄົມຮ່ວມຊາຕາກຳທີ່ເພິ່ງພາອາໄສເຊິ່ງກັນແລະກັນ. ຈີນເຊືຶ່ອໝັ້ນວ່າ: ໂລກດີຂຶ້ນແລ້ວ, ປະເທດຈີນຈຶ່ງຈະດີຂຶ້ນ; ປະເທດຈີນດີຂຶ້ນແລ້ວ, ໂລກກໍຈະດີຂຶ້ນກວ່າເກົ່າ.

来源：国际在线、广西北部湾之声